Më 15 Korrik të vitit 2016, Turqia përjetoi një grusht të shtetit që morri jetën e më shumë se 240 personave dhe me mijëra të tjerë u plagosën. Menjëhërë pas puçit të dështuar, qeveria turke bashkë me presidentin Rexhep Tajip Erdogan, miratoi një dekret ku urdhërohej mbyllja e 15 universiteteve dhe 800 konvikteve në tërë territorin e Turqisë. Me mbylljen e universiteteve, është vënë në pikëpyetje jeta akademike e 61,382 studentëve. Dekreti i njëjtë dhe të tjerët që pasuan më vonë urdhëronin pushimin nga puna e 7,316 akademikëve që punonin në 108 universitete të ndryshme të Turqisë. Disa nga ata aktualisht janë të burgosur.