នាយកសាលា មានសមាន្តចិត្តនឹងហ្គូឡិន ត្រូវបានគេចាប់ជំរឹត

លោកធឺរហ្គេ ខារាមែន (Turgay Karaman) នាយកសាលា Time International School នៅប្រទេសម៉ាឡេស៊ី ត្រូវបានចាប់ជំរឹតដោយបុរស៥នាក់ នៅកន្លែងចតឡាន ខណៈពេល គាត់កំពុងធ្វើដំណើរទៅជួបប្រជុំជាមួយដៃគូជំនួញ។ វីដេអូនៃការចាប់ខ្លួននេះថតបាននៅកន្លែង ចតឡានក្រោមផ្ទះរបស់គាត់តែម្តង។

 

លោក ខារាមែន ត្រូវបានបុរស៥នាក់ ចាប់ចូលឡាន នីស្សាន ផ្លាកលេខ WQE 8216 ដោយបង្ខំ​ នេះបើតាមរបាយការណ៏ប្តឹងទៅសមត្ថកិច្ច របស់ដៃគូជំនួញសូមមិនបញ្ចេញឈ្មោះ។ លោកបានរៀបរាប់ថា លោករង់ចាំនិងផ្ញើសារទៅ ខារាមែនជាច្រើនដងប៉ុន្តែមិនមានចម្លើយ ទើបលោក ធ្វើដំណើរទៅរកលោកខារាម៉ែនដល់ផ្ទះ ស្រាវជ្រាវរកវីដេអូនៅចំណតឡាន ព្រោះករណីចាប់ខ្លួន ជនជាតិតួកគី ធ្លាប់កើតមានពីមុនមក។

ស្របជាមួយគ្នានេះដែរ អ្នកជំនួញតួកគីដែលមានសមាន្តចិត្តនឹងចលនាហ្គូឡិនម្នាក់ទៀត គឺលោក អ៊ីសាន​ អាស្លាន ត្រូវបានចាប់ខ្លួនដូចគ្នា។ លោក អាស្លាន មានដំណែងក្នុងការិយាល័យ ពាណិជ្ជកម្ម និង ឧស្សាហកម្ម ហើយប្រពន្ធរបស់ លោក អាស្លាន បានជឿជាក់ថា លោកស្ថិតក្រោមការឃុំឃាំងនៅ ក្រសួងការពារជាតិនៃប្រទេសម៉ាឡេស៊ី។

 

កាលពីចុងឆ្នាំមុន ជនជាតិតួកគី២រូប ដែលរស់នៅប្រទេសម៉ាឡេស៊ីត្រូវបានចាប់ខ្លួនដូចគ្នា ដោយរដ្ឋាភិបាលម៉ាឡេស៊ី តាមសំណើររបស់រដ្ឋាភិបាលតួកគី។ លើសពីនេះទៀត រដ្ឋាភិបាលតួកគី បានស្នើរអោយម៉ាឡេស៊ីបំបិទសាលារៀនដែលមានទំនាក់ទំនងជាមួយចលនា ហ្គូឡិនទៀតផង។

 

ចលនាហ្គូឡិន ជាចលនាដែលរដ្ឋាភិបាលចោទប្រកាន់ ថា ជាមេខ្លោងនៃការធ្វើ រដ្ឋប្រហារកាលពីថ្ងៃ ១៥ កក្កដា ក្រោយពីការបង្រ្កាបប្រជាជនស៊ីវិលដែលមានសមាន្តចិត្ត នឹងចលនានេះ តួកគីក៏បានដាក់សំពាធ ដោយទាក់ទងទៅកាន់រដ្ឋាភិបាលប្រទេសតំបន់អាស៊ី​ ដើម្បីចាប់ខ្លួន សមាជិកចលនានេះនៅក្រៅប្រទេស។